ଉଚ୍ଚଶିକ୍ଷା ନିମନ୍ତେ ସୋଆକୁ ଅଧିକ ବିଦେଶ ଛାତ୍ରଛାତ୍ରୀ ଆସିବା ଉଚିତ୍‌: ଡାକ୍ତର ରାଜପୁରୋହିତ

ଭୁବନେଶ୍ୱର, ୧୯/୦୭: ଶିକ୍ଷା ଓ ଅନୁସନ୍ଧାନ (ସୋଆ) ଭଳି ଉଚ୍ଚକୋଟୀର ଏବଂ ଉତ୍କର୍ଷ ନିମନ୍ତେ
ସଦା ଚେଷ୍ଟିତ ଶିକ୍ଷାନୁଷ୍ଠାନକୁ ଅଧିକ ସଂଖ୍ୟକ ବିଦେଶୀ ଛାତ୍ରଛାତ୍ରୀ ଅଧ୍ୟୟନ ନିମନ୍ତେ ଆସିବା ଆବଶ୍ୟକ ବୋଲି
ମତ ରଖିଛନ୍ତି କେନ୍ଦ୍ର ବର୍ହିବ୍ୟାପାର ବିଭାଗର ପଶ୍ଚିମ ଏସିଆ ଏବଂ ଉତର ଆଫ୍ରିକାର ଯୁଗ୍ମ ସଚିବ ଡାକ୍ତର ପ୍ରଦୀପ
ସିଂ ରାଜପୁରୋହିତ ।
ମରକ୍କୋ, ଆଲଜେରିଆ, ଲିବ୍ୟା, ଇଜିପ୍ଟ, ସୁଦାନ, ଦକ୍ଷିଣ ସୁଦାନ, ସାଉଦିଆରବ, ଇରାକ, ଇରାନ୍‌,
ସିରିୟା, ଲେବାନନ୍‌, ଇସ୍ରାଏଲ୍‌, ପାଲେଷ୍ଟାଇନ୍‌, ୟେମେନ୍‌, ୟୁଏଇ, କୁଏତ୍‌, କତାର, ଓମାନ୍ ଏବଂ ବାହାରିନ୍ ଭଳି
ଦେଶଗୁଡ଼ିକର ମଧ୍ୟବିତ ପରିବାରଗୁଡ଼ିକ ସେମାନଙ୍କର ସନ୍ତାନମାନଙ୍କୁ ଉଚ୍ଚଶିକ୍ଷା ନିମନ୍ତେ ଭାରତକୁ ପଠାଇବା
ପାଇଁ ବେଶ ଆଗ୍ରହୀ । ସେହି ଦେଶଗୁଡ଼ିକରେ ବିଭିନ୍ନ ସମସ୍ୟା ସମେତ ଯୁଦ୍ଧ ପରିସ୍ଥିତି ଲାଗି ରହିଥିବାରୁ
ସେମାନଙ୍କ ପାଇଁ ଉତମମାନର ଶିକ୍ଷା, ଜୀବନଶୈଳୀ ଓ ରୋଜଗାରର ଆବଶ୍ୟକତା ରହୁଛି । ତେଣୁ ଏଭଳି
ପରିସ୍ଥିତିରେ ସୋଆ ଭଳି ଉଚ୍ଚମାନର ବିଶ୍ୱବିଦ୍ୟାଳୟ ଏହି ଛାତ୍ରଛାତ୍ରୀମାନଙ୍କୁ ନିଜ ଶିକ୍ଷାନୁଷ୍ଠାନରେ ପାଠ
ପଢ଼ାଇବାର ସୁଯୋଗ ସୃଷ୍ଟି କରିବା ଉଚିତ୍ ବୋଲି ମଙ୍ଗଳବାର ସୋଆ ପରିଦର୍ଶନ କରିବା ଅବସରରେ କହିଛନ୍ତି
ଡାକ୍ତର ରାଜପୁରୋହିତ ।
ଏହିସବୁ ଦେଶଗୁଡ଼ିକ ମଧ୍ୟରେ ଶତୃତା, ତିକ୍ତତା ଓ ସମସ୍ୟା ସମ୍ପର୍କରେ ବିସ୍ତୃତ ତଥ୍ୟ ପ୍ରଦାନ କରି
ଡାକ୍ତର ରାଜପୁରୋହିତ କହିଥିଲେ ଯେ ଭାରତ ଓ ଇସ୍ରାଏଲ୍‌ର ତଥା ଅନ୍ୟ କେତେକ ଦେଶ ସହିତ ସମ୍ପର୍କ ଖୁବ୍‌
ଭଲ ରହିଛି । ସୁଦାନ, ସୋମାଲିଆ, ଇଥିଓପିଆ ଓ ୟେମେନ୍ ଭଳି ଦେଶଗୁଡ଼ିକ ଭାରତ ପ୍ରତି ଖୁବ ଭଲ
ମନୋଭାବ ରଖନ୍ତି । ତେଣୁ ସେହି ଦେଶର ଛାତ୍ରଛାତ୍ରୀମାନେ କିଭଳି ଭାରତରେ ଏବଂ ସୋଆରେ ଶିକ୍ଷାଗ୍ରହଣ
ପାଇଁ ଆଗ୍ରହୀ ହେବେ ସେ ଦିଗରେ ଆମେ ସମସ୍ତେ ଯତ୍ନବାନ ହେବା ଆବଶ୍ୟକ ବୋଲି ଡାକ୍ତର ରାଜପୁରୋହିତ
କହିଥିଲେ ।
ସୋଆ ପରିଦର୍ଶନ ଅବସରରେ ବିଶ୍ୱବିଦ୍ୟାଳୟର ମୁଖ୍ୟ କାର୍ଯ୍ୟାଳୟରେ ଏକ ବୈଠକର ଆୟୋଜନ
କରାଯାଇଥିଲା । ଏଥିରେ ଉପକୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ସୋଆ ସମ୍ପର୍କରେ ବିସ୍ତୃତ ତଥ୍ୟ ପ୍ରଦାନ
କରିଥିଲେ । ଡାକ୍ତର ରାଜପୁରୋହିତ ମଧ୍ୟପ୍ରାଚ୍ୟ ଦେଶଗୁଡ଼ିକ ସହିତ ଭାରତର ସମ୍ପର୍କକୁ ନେଇ ନିଜର ବକ୍ତବ୍ୟ
ରଖିଥିଲେ ।
ଅନ୍ୟମାନଙ୍କ ମଧ୍ୟରେ କଂଟ୍ରୋଲର ଅଫ୍ ଏଗ୍‌ଜାମିନେସନ୍ ପ୍ରଫେସର ମଞ୍ଜୁଳା ଦାସ, ଆଇଡିଏସ୍ ଡିନ୍‌
ପ୍ରଫେସର ନୀତା ମହାନ୍ତି, ଆଇଏଏସ୍ ଡିନ୍ ପ୍ରଫେସର ବିଜୟ କୁମାର ସାହୁ, ଏସ୍‌ଏଚ୍‌ଏମ୍ ଡିନ୍ ପ୍ରଫେସର
ଶିତିକଣ୍ଠ ମିଶ୍ର, ଆଇଟିଇଆର୍ ଡିନ୍‌, ପ୍ରଫେସର ପି.କେ. ସାହୁ, ଆଇବିସିଏସ୍ ଡିନ୍ ପ୍ରଫେସର ଅନୁପ
ସାମନ୍ତରାୟ ଏବଂ ୟୁନିଭର୍ସିଟି ଆଉଟରିଚ୍ ପ୍ରୋଗ୍ରାମ୍ ଏବଂ ଇଂଟରନ୍ୟାସ୍‌ନାଲ୍ ରିଲେସନ୍‌ର ନିର୍ଦ୍ଦେଶକ
ପ୍ରଫେସର ନଚିକେତା ଶର୍ମା ପ୍ରମୁଖ ଉପସ୍ଥିତ ଥିଲେ ।
ଛାତ୍ରମଙ୍ଗଳ ଡିନ୍ ପ୍ରଫେସର ଜ୍ୟୋତିରଞ୍ଜନ ଦାସ ଧନ୍ୟବାଦ ଅର୍ପଣ କରିଥିଲେ ।