ମାଲକାନଗିରି, ୮।୫: ବେଆଇନ ଭାବେ ମୋରମ ଖନନ କରି ନିୟମକୁ ଉଲଂଘନ କରି ଚୋରା ଚାଲାଣ ବେଳେ ପ୍ରଶାସନ ପକ୍ଷରୁ ଚଢାଉ କରି ୩ଟି ଗାଡି ଜବତ କରାଯାଇଛି । ମିଳିଥିବା ସୂଚନା ଅନୁଯାୟୀ ମାଲକାନଗିରି ତହସିଲ ଅଧୀନ ଗୌଡ଼ଗୁଡ଼ା ପଞ୍ଚାୟତ ତେନ୍ତୁଲିଗୁଡ଼ା ଗାଁ ନିକଟରେ ବେଆଇନ ଭାବେ ମୋରୁମ ଖୋଳାଯାଇ ଚୋରା ଚାଳନ ହେଉଥିବା ଅଭିଯୋଗ ହେଉଥିବା ବେଳେ ଏ ସମ୍ପର୍କରେ ଖବର ପାଇ ମାଲକାନଗିରି ତହସିଲଦାର ସବିର ସାହାଙ୍କ ନେତୃତ୍ଵରେ ଏକ ଟିମ ଓ ସ୍ଥାନୀୟ ପୁଲିସ ଘଟଣାସ୍ଥଳରେ ପହଞ୍ଚିଥିଲେ। ତେବେ ପୋଲିସ ଓ ପ୍ରଶାସନକୁ ଦେଖି ସେଠାରେ ଥିବା ଗାଡି ଚାଳକ ଓ ଅନ୍ୟମାନେ ସେଠୁ ଲୁଚି ପଳାଇଥିଲେ । ତୁରନ୍ତ ପ୍ରଶାସନିକ ଟିମ ଓ ପୋଲିସ ପକ୍ଷରୁ ଘଟଣାସ୍ଥଳରୁ ଗୋଟିଏ ପ୍ରୋକଲିନ ମେସିନ, ଗୋଟିଏ ଟିପ୍ପର ଓ ଗୋଟିଏ ଟ୍ରକ୍କୁ ତହସିଲ ଜବତ କରାଯାଇଥିଲା। ତେବେ ଏହି ଘଟଣାରେ ସମ୍ପୃକ୍ତ ଥିବା ବ୍ୟକ୍ତିଙ୍କୁ ତହସିଲ ପକ୍ଷରୁ ନୋଟିସ ଜାରି କରାଯାଇ ଘଟଣାର ଅଧିକ ତଦନତ ଜାରି ରହିଥିବା ତହସଲିଦର ଶ୍ରୀ ସାହା ପ୍ରକାଶ କରିଛନ୍ତି ।
