ଭୁବନେଶ୍ୱର , ୧୬/୧୦: ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ ପକ୍ଷରୁ ରବିବାର ବିଶ୍ୱ ଆନାଟୋମି ଦିବସ ପାଳିତ ହୋଇଯାଇଛି । ଆଧୁନିକ ଶରୀର ଗଠନ ବିଜ୍ଞାନ ବା ଆନାଟୋମିର ଜନକ ବେଲ୍ଜିଆନ୍ ଡାକ୍ତର ଆଣ୍ଡ୍ରିୟସ୍ ଭେସାଲିୟସଙ୍କ ପ୍ରୟାଣ ଦିବସ ଅକ୍ଟୋବର ୧୫ ତାରିଖକୁ ଇନ୍ଟରନ୍ୟାସନାଲ୍ ଫେଡେରେସନ୍ ଅଫ୍ ଆସୋସିଏସନ୍ସ ଅଫ୍ ଆନାଟୋମିଷ୍ଟସ୍ (ଆଇଏଫ୍ଏଏ) ଦ୍ୱାରା ବିଶ୍ୱ ଆନାଟୋମି ଦିବସ ରୂପେ ପାଳନ କରାଯାଏ ।
ଏହି ଅବସରରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ଆନାଟୋମି ବିଭାଗ ପକ୍ଷରୁ ଅଂଗଦାନ ସଚେତନତା ନିମନ୍ତେ ଏକ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ଡାକ୍ତରୀ ଛାତ୍ରଛାତ୍ରୀମାନଙ୍କର ଗବେଷଣା ଓ ଶିକ୍ଷା ପ୍ରଦାନ ସହ ମୃତ ବ୍ୟକ୍ତିର ଶରୀରରୁ ଅଂଗଦାନ ନେଇ ଛାତ୍ରଛାତ୍ରୀ ଓ ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ଲକ୍ଷ୍ୟରେ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା ।
ଏହି କାର୍ଯ୍ୟକ୍ରମରେ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ଆଡିସ୍ନାଲ୍ ଡିନ୍ ପ୍ରଫେସର (ଡାକ୍ତର) ଅଜୟ କୁମାର ଜେନା ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅଖିଳ ଭାରତୀୟ ମାରୱାଡି ମହିଳା ସମ୍ମିଳନୀର ଅଧ୍ୟକ୍ଷା ଶ୍ରୀମତି ନୀଲମ୍ ଅଗ୍ରୱାଲ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । ଏହି ଅବସରରେ ଆନାଟୋମି ବିଭାଗର ମୁଖ୍ୟ ଡାକ୍ତର ସୀତାଂଶୁ କୁମାର ପଣ୍ଡା ମଧ୍ୟ ଉପସ୍ଥିତ ଥିଲେ ।
ଡାକ୍ତର ବିଶ୍ୱଭୂଷଣ ମହାନ୍ତି, ଡାକ୍ତର ସୌର୍ଯ୍ୟ ରଞ୍ଜନ ଦାସ, ଡାକ୍ତର ପ୍ରତିମା ବୈଶାକ, ଡାକ୍ତର ବି. ଶାନ୍ତା, ଡାକ୍ତର ଜ୍ଞାନ ରଞ୍ଜନ ନାୟକ, ଡାକ୍ତର ସ୍ୱାଗତିକା, ଡାକ୍ତର ଅରୁନ୍ଧତି, ଡାକ୍ତର ଚିନ୍ମୟ, ଡାକ୍ତର ଲୋପାମୁଦ୍ରା, ଡାକ୍ତର ସୁଜିତା ଓ ଅନ୍ୟାନ୍ୟ ଫ୍ୟାକଲ୍ଟି ମେମ୍ବର୍ସଙ୍କ ସହିତ ପ୍ରଥମ ବର୍ଷ ଏମ୍ବିବିଏସ୍ ଛାତ୍ରଛାତ୍ରୀମାନେ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ ।