ସଡକ ଦୁର୍ଘଟଣାରେ ଜଣେ ମୃତ ଓ ଦୁଇ ଗୁରୁତର

ମାଲକାନଗିରି,୧୮।୬: ମାଲକାନଗିରି ଜିଲ୍ଲା ବିଜାଘାଟିରେ ସଡକ ଦୁର୍ଘଟଣା, ଜଣେ ମୃତ ଓ ଦୁଇ ଗୁରୁତର ଆହତ । ମିଳିଥିବା ସୂଚନା ଅନୁଯାୟୀ ମାଲକାନଗିରି ଜିଲ୍ଲା ସଦରରୁ ଜୟପୁରକୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ମାଲକାନଗିରିର ଅଭିମୁଖେ ଆସୁଥିବା ଏକ କାର ଓଡି ୩୦ ବି ୦୨୨୨ ଦ୍ରୁତ ଗତିରେ ଆସି ପ୍ରଥମେ ରାସ୍ତା କଡରେ ଥିବା ଏକ ସିଗନାଲ ପୋସ୍ଟକୁ ଧକ୍କା ଦେବା ପରେ ସାମ୍ନା ପଟୁ ଆସୁଥିବା ଏକ ମୋଟର ସାଇକେଲକୁ ବିଜାଘାଟି ନିକଟରେ ଧକ୍କା ଦେଇଥିଲେ । ଏହି ଦୁର୍ଘଟଣାରେ ମୋଟର ସାଇକେଲରେ ବସିଥିବା ୩ ଜଣ ବ୍ୟକ୍ତି ଛିଟିକି ପଡିବା ସହ ଗୁରୁତ୍ତର ଆହତ ହୋଇଥିଲେ । ତେବେ କାର ମଧ୍ୟରେ ଥିବା ଦୁଇଜଣ ବ୍ୟକ୍ତି ସେଠାରୁ ଚମ୍ପଟ ମାରିଥିବା ସ୍ଥାନୀୟ ଲୋକେ ପ୍ରକାଶ କରିଥିବା ବେଳେ ଆହତ ମାନଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ । ସେଠାରେ ଜଣଙ୍କୁ ଡାକ୍ତର ମୃତ ଘୋଷଣା କରିଥିବା ବେଳେ ଅନ୍ୟ ଦୁଇଜଣଙ୍କ ଗୁରୁତର ଅବସ୍ଥାରେ ଚିକିତ୍ସା ଜାରି ରହିଛି । ଉକ୍ତ କାରଟି କାହାର ସେନେଇ କୌଣସି ସୂଚନା ମିଳିନାହିଁ ।