ଭୁବନେଶ୍ୱର: ସ୍ଥାନୀୟ ସତ୍ୟନଗର ଅନ୍ତର୍ଗତ ଶାନ୍ତିପଲ୍ଲୀ ବସ୍ତିରେ ବୁଧବାର ଅନ୍ତର୍ଜାତୀୟ ମହିଳା ଦିବସ ପାଳିତ ହୋଇଯାଇଛି l ପ୍ରଥମ ଥର ୭0ରୁ ଅଧିକ ମହିଳା ଏକାଠି ହୋଇ ଏଭଳି ଏକ କାର୍ଯ୍ୟକ୍ରମର ଆୟୋଜନ କରିଥିଲେ l ଏହି ଅବସରରେ ବିଭିନ୍ନ ପ୍ରତିଯୋଗିତାମାନ ଆୟୋଜନ ହୋଇଥିଲା l ଏଥିରେ ବିଶେଷ କରି କୁନି କୁନି ପିଲାଙ୍କଠାରୁ ଆରମ୍ଭ କରି ମହିଳାମାନେ ବି ଯୋଗଦେଇଥିଲେ l ଛୋଟ ପିଲାଙ୍କ ଲାଗି ଝୋଟି ଏବଂ ଡ୍ରଇଁ ପ୍ରତିଯୋଗିତାର ଆୟୋଜନ କରାଯାଇଥିବା ବେଳେ ମହିଳାମାନଙ୍କ ମଧ୍ୟରେ ମିଉଜିକ ଚେୟାର ଖେଳ ହୋଇଥିଲା l 5ଟି ମହିଳା ଆରୋଗ୍ୟ ସମିତି ପକ୍ଷରୁ ଏହି କାର୍ଯ୍ୟକ୍ରମ ହୋଇଥିଲା l ମୁଖ୍ୟ ଅତିଥି ଭାବେ ସ୍ଥାନୀୟ କର୍ପୋରେଟର ପୁଷ୍ପାଞ୍ଜଳି ସେଠି ଯୋଗ ଦେଇ ମହିଳାମାନେ ଆଜିର ଦିନରେ ଆଉ ଦୁର୍ବଳା ହୋଇ ରହିନାହାନ୍ତି l ନିଜ ଗୋଡରେ ନିଜେ ଠିଆ ହେବା ସହ ସମାଜରେ ନିଜର ପରିଚୟ ସୃଷ୍ଟି କରିପାରିଛନ୍ତି ବୋଲି କହିଥିଲେ l
