ଭୁବନେଶ୍ବର: କମିସନରେଟ୍ ପୁଲିସ ଅଧିନ ସୁନ୍ଦରପଦା ହାଇଟେକ ଛକରେ ଗୋରୁ ଚମଡ଼ା ବୋଝଇ ଟ୍ରକ୍ ଧରାପଡ଼ିଛି। ବାହାରକୁ ଚାଲାଣ ପାଇଁ ଟ୍ରକ୍ଟି ଯାଉଥିବା ସନ୍ଦେହ କରି ସ୍ଥାନୀୟ ଯୁବକମାନେ ଗାଡ଼ିକୁ ଅଟକାଇ ଥିଲେ। ଗାଡ଼ିର ପାଲ ଖୋଲିବା ପରେ ଶହ ଶହ ଗୋରୁ ଚମଡ଼ା ଦେଖି ଲୋକେ ଉତ୍ୟକ୍ତ ହୋଇଥିଲେ। ଗୋରୁ ଚମଡ଼ା ବୋଝୋଇ ଟ୍ରକକୁ ଓଲଟାଇବା ସହ ରାସ୍ତା ରୋକ କରିଛନ୍ତି। ସ୍ଥାନୀୟ ଯୁବକ ଟ୍ରକ ଡ୍ରାଇଭର ଓ ହେଲପରକୁ ନିର୍ଦ୍ଧୁମ ଛେଚି ଥିଲେ। କିଛି ସମୟ ପାଇଁ ଉତେଜନା ପ୍ରକାଶ ପାଇଥିଲା।
ଖବର ପାଇ ଘଟଣାସ୍ଥଳରେ ଜୋନ୍ ୨ଏସିପି ଓ ଏୟାରଫିଲ୍ଡ ଥାନା ପୁଲିସ, ଲିଙ୍ଗରାଜ ଥାନା ପୁଲିସ ଓ ଏକ ପ୍ଲାଟୁନ ଫୋର୍ସ ପହଞ୍ଚି ସ୍ଥିତିକୁ ନିୟନ୍ତ୍ରଣ କରିଛନ୍ତି। ଏହି ଘଟଣାକୁ ପୁଲିସ ଗୁରୁତର ସହ ନେଇ ତଦନ୍ତ କରୁଥିବା ଜୋନ୍ ୨ ଏସିପି ଗିରିଜା ଶଙ୍କର ଚକ୍ରବର୍ତ୍ତୀ ସୂଚନା ଦେଇଛନ୍ତି। ଏଭଳି ଘଟଣା ବାରମ୍ବାର ଘଟୁଥିବା ବେଳେ ପୁଲିସର ନିରବତାକୁ ନେଇ ସ୍ଥାନୀୟ ଯୁବକ ଅସନ୍ତୋଷ ପ୍ରକାଶ କରିଛନ୍ତି। ଆଗାମୀ ଦିନରେ ଆନ୍ଦୋଳନକୁ ତୀବ୍ରତର କରିବାକୁ ଚେତାବନୀ ଦେଇଛି ଆନ୍ଦୋଳନକାରୀ।