କଟକ: କଟକ ସହରର ନୂଆ ଡିସିପି ଭାବେ କାର୍ଯ୍ୟରେ ଯୋଗ ଦେଇଛନ୍ତି ବରିଷ୍ଠ ଆଇପିଏସ ଅଧିକାରୀ ଡ. କନଓ୍ବର୍ ବିଶାଳ ସିଂ । ସେ ପୂର୍ବରୁ ପୁରୀ ଆରକ୍ଷୀ ଅଧିକ୍ଷକ ଭାବେ କାର୍ଯ୍ୟ ତୁଲାଇଥିବା ବେଳେ କଟକରେ ବୁଧବାର କାର୍ଯ୍ୟରେ ଯୋଗ ଦେଇଛନ୍ତି । ଡିଆଇଜି ପାହ୍ୟାକୁ ପଦୋନ୍ନତି ପାଇ ସାରିଥିବା କେ.ଭି. ସିଂ ପୂର୍ବରୁ ପୁରୀରେ ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କରିବାରେ ବେଶ୍ ସକ୍ଷମ ହୋଇଥିବା ବେଳେ ବର୍ତ୍ତମାନ କଟକରେ ଦାୟିତ୍ୱ ନେଇଛନ୍ତି ।
ବୁଧବାର ମଧ୍ୟାହ୍ନରେ ଦାୟିତ୍ୱ ଗ୍ରହଣ କରିବା ବେଳେ ତାଙ୍କୁ କଟକର ଅନ୍ୟ ବରିଷ୍ଠ ପୋଲିସ ଅଧିକାରୀମାନେ ସ୍ବାଗତ ସମ୍ବର୍ଦ୍ଧନା ଦେଇଥିଲେ । ଏହାପରେ ସମସ୍ତ ଥାନା ଅଧିକାରୀମାନଙ୍କ ଠାରୁ ସମ୍ବର୍ଦ୍ଧନା ଗ୍ରହଣ କରିଥିଲେ । କ୍ରାଇମ୍ ଓ କ୍ରିମିନାଲ କଣ୍ଟ୍ରୋଲ ହେଉ ଅବା ଆଗକୁ ଆସୁଥିବା ନିର୍ବାଚନ ମାହୋଲକୁ ନିଶ୍ଚିତ ଭାବରେ ସମସ୍ତଙ୍କ ସହଯୋଗ ନେଇ ତୁଲାଇ ପାରିବେ ବୋଲି ପ୍ରଥମ ପ୍ରତିକ୍ରିୟା ରଖିଛନ୍ତି । ସେହିଭଳି ଭାଇଚାରାର ସହରରେ ଲୋକଙ୍କ ସହ ମିଶି ଲୋକଙ୍କ ପାଇଁ କାର୍ଯ୍ୟ କରିବା କଥା ଡିସିପି କେ.ଭି. ସିଂ କହିଛନ୍ତି ।