ଯୁବ ବିଜେଡିର ରାଜ୍ୟକାରିଣୀ ବୈଠକ: ୧୪୭ ବିଧାନସଭା ଆସନ ଜିତିବା ପାଇଁ ରଣନୀତି; ସଶକ୍ତ ଓଡ଼ିଶା ଗଠନ ପାଇଁ ମୁଖ୍ୟମନ୍ତ୍ରୀଙ୍କ ଆହ୍ୱାନ
ଭୁବନେଶ୍ୱର: ବିଜେଡି ଫୋକସରେ ୨୦୨୪ ନିର୍ବାଚନ । ଏଥିପାଇଁ ରୋଡମ୍ୟାପ୍ ପ୍ରସ୍ତୁତ କରିନେଇଛି ଦଳ । ବିଜୁ ଯୁବ ଜନତା ଦଳର ରାଜ୍ୟ କାର୍ଯ୍ୟକାରିଣୀ ବୈଠକରେ ଏନେଇ ରାଜନୈତିକ ଓ ସାଙ୍ଗଠନିକ ପ୍ରସ୍ତାବ ପାରିତ ହୋଇଛି । କାର୍ଯ୍ୟକାରିଣୀରେ ଭିଡିଓ କନଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇ ନିର୍ବାଚନୀ ମନ୍ତ୍ର ଦେଇଛନ୍ତି ।
- ଯୁବ ବିଜେଡିର ରାଜ୍ୟ କାର୍ଯ୍ୟକାରିଣୀ ବୈଠକ
- ୨୦୨୪ ପାଇଁ ରୋଡମ୍ୟାପ୍ ପ୍ରସ୍ତୁତ
- ସଶକ୍ତ ଓଡ଼ିଶା ଗଠନ ପାଇଁ ମୁଖ୍ୟମନ୍ତ୍ରୀଙ୍କ ଆହ୍ୱାନ
ଶଙ୍ଖଭବନରେ ଅନୁଷ୍ଠିତ ହୋଇଛି ବିଜୁ ଯୁବ ଜନତା ଦଳର ରାଜ୍ୟ କାର୍ଯ୍ୟକାରିଣୀ ବୈଠକ । ଫୋକସରେ ରହିଛି ୨୦୨୪ ନିର୍ବାଚନ । ପାରିତ ହେଲା ରାଜନୈତିକ, ସାଂଗଠନିକ ପ୍ରସ୍ତାବ । ମୁଖ୍ୟମନ୍ତ୍ରୀଙ୍କ ବିକାଶମୂଳକ କାମ ପାଇଁ ଧନ୍ୟବାଦ ଜଣାଇବା ସହ କେନ୍ଦ୍ର ଅବହେଳା ବିରୋଧରେ ବର୍ଷିଛନ୍ତି ଯୁବ ବିଜେଡି ନେତା । ଯୁବ ବିଜେଡିର ରାଜନୈତିକ ପ୍ରସ୍ତାବରେ ରହିଛି…
- ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା
- ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ
- ଦରଦାମ ନିୟନ୍ତ୍ରଣ ନହେଲେ କେନ୍ଦ୍ର ବିରୋଧରେ ଆନ୍ଦୋଳନ ଚେତାବନୀ
- ସାଂଗଠନିକ ପ୍ରସ୍ତାବ ରେ ରହିଛି
- ଅଗଷ୍ଟ ୯ କ୍ରାନ୍ତି ଦିବସରୁ ପ୍ରତି ୱାର୍ଡରେ ସଂକଳ୍ପ ସମାବେଶ
- ନବୀନ ପଟ୍ଟନାୟକଙ୍କୁ ଷଷ୍ଠ ଥର ମୁଖ୍ୟମନ୍ତ୍ରୀ କରିବାକୁ ସଂକଳ୍ପ
- ଆହୁରି ୫୦ ହଜାର ୟୁନିଟ ରକ୍ତ ସଂଗ୍ରହ ଲକ୍ଷ୍ୟ
ଭିଡିଓ କନଫରେନ୍ସିଂ ଜରିଆରେ ଯୁବ ବିଜେଡି କାର୍ଯ୍ୟକାରିଣୀରେ ଯୋଗ ଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭିଡିଓ ବାର୍ତ୍ତା ଦେଇ ନବୀନ କହିଛନ୍ତି, ରାଜ୍ୟ ବିକାଶରେ ଯୁବ ସମାଜର ଭୂମିକା ଗୁରୁତ୍ୱପୂର୍ଣ୍ଣ । ବିକାଶ କାର୍ଯ୍ୟରେ ଯୁବବର୍ଗ ଅଧିକ ସଂଖ୍ୟାରେ ଯୋଡ଼ିହେଲେ ସଶକ୍ତ ଓଡ଼ିଶା ଗଠନ ହେବ । ଅନ୍ୟପଟେ ଆଗାମୀ ନିର୍ବାଚନରେ ସମସ୍ତ ୧୪୭ଟି ବିଧାନସଭା ଆସନରେ ବିଜେଡିକୁ ବିଜୟୀ କରିବା ପାଇଁ କାର୍ଯ୍ୟ କରାଯିବ ବୋଲି କହିଛନ୍ତି ବିଜୁ ଯୁବ ଜନତା ଦଳର ସଭାପତି ବ୍ୟୋମକେଶ ରାୟ ।
ସୂଚନାଯୋଗ୍ୟ ଯେ, ବିଜେଡିର ସାଂଗଠନିକ ସଂପାଦକ ପ୍ରବଣ ପ୍ରକାଶ ଦାସଙ୍କ ସମ୍ବଲପୁର ଗସ୍ତ ସମୟରେ ଦଳ ଭିତରେ ଥିବା ଫାଟ ପଦାରେ ପଡ଼ିଥିଲା । ସମ୍ବଲପୁର ସହରରେ ସାଙ୍ଗଠନିକ ସମ୍ପାଦକଙ୍କୁ ସ୍ୱାଗତ କରିବା ପାଇଁ ଅଲଗା ଅଲଗା କାର୍ଯ୍ୟକ୍ରମ କରିଥିଲେ ନେତା । ଅଲଗା ଅଲଗା ପୋଷ୍ଟର ଲଗାଇଥିଲେ । ସୁଶାନ୍ତ ସିଂ, ରୋହିତ ପୂଜାରୀ, ରାଶେଶ୍ୱରୀ ପାଣିଗ୍ରାହୀ, ବିଶାଳ ଦାସ ଭିନ୍ନ ଭିନ୍ନ ସ୍ଥାନରେ ସ୍ୱାଗତ କରିଥିଲେ । ଆଜି ଶଙ୍ଖଭବନରେ ପଶ୍ଚିମ ଓଡ଼ିଶାର ବିଧାୟକ, ନେତାଙ୍କୁ ନେଇ ବୈଠକ କରାଯାଇଥିଲା । ସମସ୍ତେ ଏକାଠି ହୋଇ ଦଳୀୟ ସଂଗଠନକୁ ମଜବୁତ କରିବା ଉପରେ ଆଲୋଚନା କରାଯାଇଛି ।
୨୦୨୪ ପାଇଁ ବିଜେଡି ଶିବିରରେ ଜୋରଦାର କସରତ ଆରମ୍ଭ ହୋଇଯାଇଛି । ରାଜ୍ୟ ସରକାରଙ୍କ ଜନହିତକର କାର୍ଯ୍ୟକୁ ସୋସିଆଲ ମିଡିଆ ଜରିଆରେ ଅଧିକରୁ ଅଧିକ ଲୋକଙ୍କ ନିକଟରେ ପହଁଚାଇବା ପାଇଁ ଯୁବ ବିଜେଡି ନେତା ଓ କର୍ମୀଙ୍କୁ କୁହାଯାଇଛି ।