ଭୁବନେଶ୍ବର, ଜାନୁୟାରୀ ୩୧: ଓଡ଼ିଶାର ଅନୁସୂଚିତ ଜନଜାତିଙ୍କ ଭାଷାର ସଂରକ୍ଷଣ, ପ୍ରଚାର ଓ ପ୍ରସାର ନିମନ୍ତେ ଭାଷା ଆୟୋଗ ଗଠନ ପାଇଁ ରାଜ୍ୟ କ୍ୟାବିନେଟର ଐତିହାସିକ ନିଷ୍ପତ୍ତିକୁ ରାଜ୍ୟର ସମଗ୍ର ଆଦିବାସୀ ସମ୍ପ୍ରଦାୟ ସ୍ୱାଗତ କରିଛନ୍ତି । ଏଭଳି ଏକ ଖୁସିର ବେଳାରେ ଭୁବନେଶ୍ବର ୟୁନିଟ୍-୧ ସ୍ଥିତ ଆଦିବାସୀ ପ୍ରଦର୍ଶନୀ ପଡ଼ିଆରେ ଚାଲିଥିବା ଆଦିବାସୀ ମେଳାରେ ଆସନ୍ତା ଫେବ୍ରୁଆରି ୩ରୁ ୫ ତାରିଖ ମଧ୍ୟରେ ସାନ୍ତାଳି, ଦେଶିଆ, ହୋ ଓ ମୁଣ୍ଡାରୀ ଭାଷାରେ ତିନି ଦିନ ଧରି ବହୁଭାଷୀ ନାଟକ ମହୋତ୍ସବ ଅନୁଷ୍ଠିତ ହେବ।
ଆଦିବାସୀ ମେଳାରେ ବହୁଭାଷୀ ନାଟକ ମହୋତ୍ସବର ପ୍ରଥମ ଦିନରେ ମୟୂରଭଞ୍ଜ ଜିଲ୍ଲା ଉଦଳା ବ୍ଲକ ଉଲିଡିହିର ଆୟା ବାବା ଗୟାନ ସେମଲେଡ ସାନ୍ତାଳି ନାଟକ ପରିବେଷଣ କରିବାକୁ ଥିବା ବେଳେ କୋରାପୁଟ ଜିଲ୍ଲାର କୋରାପୁଟିଆ ଦେଶିଆ ଡ୍ରାମାଟିକ୍ କ୍ଲବ ଦେଶୀଆ ଭାଷାରେ ନାଟକ ପରିବେଷଣ କରିବେ । କାର୍ଯ୍ୟକ୍ରମ ଦ୍ଵିତୀୟ ଦିନରେ ମୟୂରଭଞ୍ଜ ଜିଲ୍ଲା କରଞ୍ଜିଆ ବାଲିଭୋଇସ୍ଥିତ ପଣ୍ଡିତ ଲୋକୋବଦ୍ରା ଡ୍ରାମାଟିକ୍ କ୍ଲବ ପକ୍ଷରୁ ହୋ ଭାଷାରେ ନାଟକ ପରିବେଷଣ କରାଯିବାକୁ ଥିବା ବେଳେ ମୟୂରଭଞ୍ଜ ଜିଲ୍ଲା ବଡ଼ସାହି ବ୍ଲକ ଅଷ୍ଟଝରଣାର ବାବା ଚିନ୍ତାମଣି ଡ୍ରାମାଟିକ୍ କ୍ଲବ ଆସନ୍ତା ୪ ତାରିଖରେ ମୁଣ୍ଡାରୀରେ ନାଟକ ପରିବେଷଣ କରିବ । ସେହିପରି ମୟୂରଭଞ୍ଜ ଜିଲ୍ଲା ଉଦଳା ନିକଟ ଖଡିଆବାସାରୁ ଗଙ୍ଗାମଣ୍ଡିଲ ଡ୍ରାମାଟିକ୍ କ୍ଲବ ପକ୍ଷରୁ ଆସନ୍ତା ୫ ତାରିଖରେ ଆଦିବାସୀ ମେଳାରେ ମୁଣ୍ଡାରୀ ଭାଷାରେ ନାଟକ ପରିବେଷଣ କରାଯିବ।
ଓଡ଼ିଶାରେ ୬୨ଟି ଆଦିବାସୀ ସମ୍ପ୍ରଦାୟ ଓ ୧୩ଟି ଆଦିମ ଜନଜାତି ଗୋଷ୍ଠୀ ବା ପିଭିଟିଜି ରହିଛନ୍ତି। ଓଡ଼ିଶାରେ ୨୧ଟି ଆଦିବାସୀ ଭାଷା ରହିଥିବାରୁ ରାଜ୍ୟ ସରକାର ଆଦିବାସୀ ଭାଷା ଓ ଉପଭାଷାର ସଂରକ୍ଷଣ, ପ୍ରଚାର, ପ୍ରସାର, ବିକାଶ ଓ ସୁରକ୍ଷା କରିବାକୁ ଚାହୁଁଛନ୍ତି ବୋଲି କହିଛନ୍ତି ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ, ସଂଖ୍ୟାଲଘୁ ଓ ପଛୁଆ ଗୋଷ୍ଠୀ କଲ୍ୟାଣ ବିଭାଗ କମିଶନର ତଥା ସଚିବ ରୂପା ରୋଶନ ସାହୁ। ଏହି ବହୁଭାଷୀ ନାଟକ ମହୋତ୍ସବ ସେହି ଦିଗରେ ଏକ ପଦକ୍ଷେପ। ଭୁବନେଶ୍ବରରେ ଆୟୋଜିତ ହେବାକୁ ଥିବା ପ୍ରଥମ ବିଶ୍ୱ ଓଡ଼ିଆ ଭାଷା ସମ୍ମିଳନୀ ରେ ମଧ୍ୟ ଆମେ ଏହାକୁ ଏକ ଅତିଥି କାର୍ଯ୍ୟକ୍ରମ ଭାବେ ଆୟୋଜନ କରୁଛୁ ବୋଲି ସେ କହିଛନ୍ତି ।
ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ କମିଶନର ତଥା ସଚିବ ରୂପା ରୋଶନ ସାହୁ ଆହୁରି ମଧ୍ୟ କହିଛନ୍ତି ଯେ, ଆଦିବାସୀ ଭାଷାର ଦସ୍ତାବିଜିକରଣ, ସଂରକ୍ଷଣ ପାଇଁ ରାଜ୍ୟ ସରକାର ବହୁଭାଷୀ ଶିକ୍ଷା ଓ ପ୍ରୟାସ ଆରମ୍ଭ କରିସାରିଛନ୍ତି। ଆଦିବାସୀ ଭାଷାଗୁଡ଼ିକର ବିକାଶ ପାଇଁ ବିଭିନ୍ନ ସମୃଦ୍ଧମୂଳକ କାର୍ଯ୍ୟକଳାପ ମଧ୍ୟରେ ସେହି ଭାଷାଗୁଡ଼ିକର ବ୍ୟବହାରକୁ ପ୍ରୋତ୍ସାହିତ କରିବା ଏବଂ ଭାଷାଗତ ଅଧିକାରର ସୁରକ୍ଷା କରିବା ଭଳି ପଦକ୍ଷେପ ଗ୍ରହଣ କରାଯାଉଛି ।
ମେଳାରେ ଯୋଗଦେଇ ଆଦିବାସୀ ଜାତି ଓ ଜନଜାତି ଗବେଷଣା ଓ ପ୍ରଶିକ୍ଷଣ ପ୍ରତିଷ୍ଠାନର ରାଜ୍ୟ ଭାଷା ସଂଯୋଜକ ପରମାନନ୍ଦ ପଟେଲ କହିଛନ୍ତି, ଆଦିବାସୀ ସଂସ୍କୃତି ଓ ଭାଷାର ଗବେଷଣା ପାଇଁ ଆଦିବାସୀ ଭାଷା ଓ ସଂସ୍କୃତି ଏକାଡେମୀ ବା ଏଟିଏଲସି ବିଭିନ୍ନ ଆଦିବାସୀ ସମ୍ପ୍ରଦାୟଙ୍କ ପାଇଁ କାର୍ଯ୍ୟ କରୁଛି । ଯେହେତୁ ରାଜ୍ୟରେ ୨୧ଟି ଆଦିବାସୀ ଭାଷା ବ୍ୟତୀତ ୭୪ଟି ଉପଭାଷା ରହିଛି, ଯାହା ନିଜେ ଏକ ସମ୍ପଦ କାରଣ ଆମ ରାଜ୍ୟର ଜନସଂଖ୍ୟାର ୨୨.୮୫ ପ୍ରତିଶତ ଆଦିବାସୀ ସମ୍ପ୍ରଦାୟର । ରାଜ୍ୟ ରାଜଧାନୀରେ ଆଦିବାସୀ
ମେଳା ଓ ବିଶ୍ୱ ଓଡ଼ିଆ ଭାଷା ସମ୍ମିଳନୀ ଏକା ସାଙ୍ଗରେ ହେଉଥିବା ବେଳେ ବହୁଭାଷୀ ନାଟକ ମହୋତ୍ସବ ମଧ୍ୟ ମହାନ ବିବିଧତାକୁ ପାଳନ କରିବାର ଏକ ଅବସର ବୋଲି ଶ୍ରୀ ପଟେଲ କହିଛନ୍ତି ।
ସମସ୍ତ ୨୧ଟି ଆଦିବାସୀ ଭାଷାକୁ ବହୁଭାଷୀ ଶିକ୍ଷା ଢାଞ୍ଚାରେ ଅନ୍ତର୍ଭୁକ୍ତ କରିବା ଏକ ବଡ଼ ଚ୍ୟାଲେଞ୍ଜ ଏବଂ ଅନୁସୂଚିତ ଜନଜାତି, ଅନୁସୂଚିତ ଜାତି ବିକାଶ ସଂଖ୍ୟାଲଘୁ ଓ ପଛୁଆ ଗୋଷ୍ଠୀ କଲ୍ୟାଣ ବିଭାଗ ଏହାକୁ ସମଗ୍ର ରାଜ୍ୟରେ ସଫଳତାର ସହ କାର୍ଯ୍ୟକାରୀ କରିଛି ବୋଲି ଭାଷାବିତ୍ ତଥା ଆଦିବାସୀ ସଂସ୍କୃତି ବିଶେଷଜ୍ଞ ଶ୍ରୀ ପଟେଲ କହିଛନ୍ତି। ଆଦିବାସୀ ଜୀବନ ବିଭିନ୍ନ ନୃତ୍ୟ ଏବଂ ସଙ୍ଗୀତ ଶୈଳୀର ଏକ ଜ୍ଞାନକୋଷ ଏବଂ ସେମାନଙ୍କର ନାଟକ ମଧ୍ୟ ନୃତ୍ୟ ଏବଂ ଗୀତ ଉପରେ ଆଧାରିତ । ଯେହେତୁ ଆଦିବାସୀଙ୍କ ନାଟକ ଅନ୍ୟ ଆଧୁନିକ ଭାରତୀୟ ମୁଖ୍ୟସ୍ରୋତ ଭାଷାର ନାଟକର ଆଧୁନିକ ରୂପାନ୍ତରଠାରୁ ବହୁ ଦୂରରେ,ତେଣୁ ଆମେ ସେମାନଙ୍କ ନାଟକରେ ପ୍ରକୃତି, ଜନଜାତି ଜୀବନ-ଜୀବିକା ଏବଂ ପାରମ୍ପରିକ ସାଧାରଣ ଜୀବନ ଶୈଳୀ ସମ୍ବନ୍ଧିତ ସ୍ପର୍ଶ ଉପଭୋଗ କରିପାରିବା ବୋଲି ଶ୍ରୀ ପଟେଲ କହିଛନ୍ତି ।
ଆଦିବାସୀ ମେଳାରେ ତିନି ଦିନ ଧରି ଚାଲିବାକୁ ଥିବା ଏହି ବହୁଭାଷୀ ନାଟକ ମହୋତ୍ସବରେ ଅନୁସୂଚିତ ଜନଜାତି ନାଟକ ଦିବସ ପାଳନ କରାଯିବ । ଏହି କାର୍ଯ୍ୟକ୍ରମ ଆଦିବାସୀ ବହୁଭାଷୀ ସଂସ୍କୃତି ବିଷୟରେ ସାଧାରଣ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବ ଏବଂ ଏହି ବାର୍ଷିକ ବହୁ-ପ୍ରତୀକ୍ଷିତ ଆଦିବାସୀ ମେଳାରେ ଯୋଗ ଦେଇଥିବା ଅଧିକାଂଶ ନାଟକ ଦଳରେ ପ୍ରତିଯୋଗୀ ମହିଳା ରହିଛନ୍ତି ସେମାନେ ସେମାନଙ୍କ ପ୍ରତିଭା ପ୍ରଦର୍ଶନ କରି ଖୁସି ହେବେ । ଏହି ବହୁଭାଷୀ ଆଦିବାସୀ ନାଟକ ମହୋତ୍ସବ ଉତ୍ତର ଓଡ଼ିଶା ଓ ଦକ୍ଷିଣ ଓଡ଼ିଶାର ଆଦିବାସୀ ନାଟକ ପରମ୍ପରାର ଏକ ବଡ଼ ସଂଗ୍ରହ ଏବଂ ଏଥିରେ ସଚେତନ ଜନସାଧାରଣ ଓ ସଂସ୍କୃତିପ୍ରେମୀଙ୍କ ସମ୍ମୁଖରେ ଏକ ନିଆରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ।