ମୁମ୍ବାଇ ଇଣ୍ଡିଆନ୍ସରେ ପାଣ୍ଡ୍ୟାଙ୍କ କାର୍ଯ୍ୟକାଳ ଆରମ୍ଭ ହେଉ ହେଉ ରୋହିତ ଶର୍ମାଙ୍କ ଦଶ ବର୍ଷର ଅଧିନାୟକତ୍ୱ ଯୁଗର ଅବସାନ ଘଟିଛି।
ନୂଆଦିଲ୍ଲୀ: ପୁରୁଣା ଫ୍ରାଞ୍ଚାଇଜକୁ ଫେରୁ ଫେରୁ ହାର୍ଦ୍ଦିକ ପାଣ୍ଡ୍ୟାଙ୍କୁ ମିଳିଲା ଗୁରୁ ଦାୟିତ୍ୱ। ୨୦୨୪ ଆଇପିଏଲ୍ ସିଜିନ୍ ପୂର୍ବରୁ ହାର୍ଦ୍ଦିକ ପାଣ୍ଡ୍ୟାଙ୍କୁ କ୍ୟାପ୍ଟେନ କରିଛି ମୁମ୍ବାଇ ଇଣ୍ଡିଆନ୍ସ। ମୁମ୍ବାଇ ଇଣ୍ଡିଆନ୍ସରେ ପାଣ୍ଡ୍ୟାଙ୍କ କାର୍ଯ୍ୟକାଳ ଆରମ୍ଭ ହେଉ ହେଉ ରୋହିତ ଶର୍ମାଙ୍କ ଦଶ ବର୍ଷର ଅଧିନାୟକତ୍ୱ ଯୁଗର ଅବସାନ ଘଟିଛି।
ରୋହିତ ଶର୍ମା ୨୦୧୩ରେ ମୁମ୍ବାଇ ଟିମର ଅଧିନାୟକ ହୋଇଥିଲେ। ତାଙ୍କ ନେତୃତ୍ୱରେ ମୁମ୍ବାଇ ପାଞ୍ଚ ଥର ଆଇପିଏଲ୍ ଟ୍ରଫି ଜିତିଥିଲା। ତେବେ ବର୍ତ୍ତମାନ ରୋହିତ ମୁମ୍ବାଇର ଅଧିନାୟକ ପଦ ହରାଇଛନ୍ତି। କିନ୍ତୁ ସେ ଦଳ ସହ ରହିବେ। ଜଣେ ସାଧାରଣ ଖେଳାଳି ଭାବେ ସେ ୨୦୨୪ ଆଇପିଏଲ ସିଜିନରେ ନଜର ଆସିବେ। ଏଥିସହ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକତ୍ୱରେ ସହାୟତା ମଧ୍ୟ କରିବେ ବୋଲି ଟିମ୍ ପରିଚାଳନା ବିଭାଗ ସୂଚନା ଦେଇଛି।
ପାଣ୍ଡ୍ୟା ନିକଟରେ ଗୁଜରାଟ ଟାଇଟାନ୍ସ ଛାଡି ମୁମ୍ବାଇ ଇଣ୍ଡିଆନ୍ସକୁ ଫେରିଥିଲେ। ସେ ଗତ ଦୁଇ ସିଜିନରେ ଟାଇଟନ୍ସର ଅଧିନାୟକ ଥିଲେ। ଏହି ସମୟ ମଧ୍ୟରେ ଟାଇଟନ୍ସକୁ ୨୦୨୨ରେ ଚାମ୍ପିଅନ୍ ଏବଂ ୨୦୨୩ରେ ରନର୍ସ ଅପ୍ କରାଇଥିଲେ। କିନ୍ତୁ ତାଙ୍କର ଆଇପିଏଲ୍ କ୍ୟାରିଅର୍ ମୁମ୍ବାଇ ଇଣ୍ଡିଆନ୍ସରୁ ହିଁ ଆରମ୍ଭ ହୋଇଥିଲା। ୨୦୨୪ରେ ସେ ନିଜର ପୁରୁଣା ଟିମ୍ ମୁମ୍ବାଇର ମଙ୍ଗ ଧରିବାକୁ ଯାଉଛନ୍ତି।
ଦଳର ଏହି ପରିବର୍ତ୍ତନ ବାବଦରେ ସୂଚନା ଦେଇ ମୁମ୍ବାଇ ଇଣ୍ଡିଆନ୍ସ ଗ୍ଲୋବାଲ ପର୍ଫମାନ୍ସ ମୁଖ୍ୟ ମହେଲା ଜୟବର୍ଦ୍ଧେନେ କହିଛନ୍ତି, “ଦଳକୁ ଭବିଷ୍ୟତ ପାଇଁ ପ୍ରସ୍ତୁତ ରଖିବା ପାଇଁ ଏହା ଏକ ପରିବର୍ତ୍ତନ। ସଚିନଙ୍କଠାରୁ ହରଭଜନ ଏବଂ ରିକିଙ୍କଠାରୁ ରୋହିତଙ୍କ ପର୍ଯ୍ୟନ୍ତ ସମସ୍ତେ ମୁମ୍ବାଇ ଇଣ୍ଡିଆନ୍ସକୁ ଅତୁଳନୀୟ ନେତୃତ୍ୱ ଦେଇଛନ୍ତି। ଏହି ପରିବର୍ତ୍ତନ ସହ ହାର୍ଦ୍ଦିକ ପାଣ୍ଡ୍ୟାଙ୍କୁ ଆଇପିଏଲ୍ ୨୦୨୪ ସିଜିନ ପାଇଁ ମୁମ୍ବାଇ ଇଣ୍ଡିଆନ୍ସର ଅଧିନାୟକତ୍ୱ ଦିଆଯାଉଛି।”
ଏଥିସହ ରୋହିତ ଶର୍ମାଙ୍କ ଦୀର୍ଘ ୧୦ ବର୍ଷର ନେତୃତ୍ୱକୁ କୃତଜ୍ଞତା ଜଣାଇଛନ୍ତି ମହେଲା ଜୟବର୍ଦ୍ଧେନେ।