ଭୁବନେଶ୍ୱର, ୦୪/୦୪: ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ କୃଷି ମହାବିଦ୍ୟାଳୟରେ ଉତ୍କଳ ଦିବସ ଉପଲକ୍ଷେ ଶନିବାର ଏକ ସ୍ୱତନ୍ତ୍ର ସାଂସ୍କୃତିକ ସନ୍ଧ୍ୟା “ଉତ୍କର୍ଷିକା” ଅନୁଷ୍ଠିତ ହୋଇଯାଇଛି ।
ଏହି ଆକର୍ଷଣୀୟ ସନ୍ଧ୍ୟାରେ ମହାବିଦ୍ୟାଳୟର ଅଧ୍ୟାପକ, ଅଧ୍ୟାପିକା ତଥା କର୍ମଚାରୀମାନଙ୍କ ଦ୍ୱାରା ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ଓ ଏହି ସମ୍ପୂର୍ଣ୍ଣ ଉତ୍ସବକୁ ଉତ୍କଳ ମାଟିର କୀର୍ତି ଓ ଗାରୀମାମୟ ଇତିହାସ ପ୍ରତି ସମର୍ପିିତ କରାଯାଇଥିଲା ।
ଏହି ଉତ୍ସବ ଆରମ୍ଭରୁ ଡକ୍ଟର ପ୍ରଭାତ କୁମାର ଷଡ଼ଙ୍ଗୀ ଉତ୍କଳର ଗାରୀମାମୟ ଇତିହାସ ବିଷୟରେ ଆଲୋକପାତ କରିବା ସହ ଅତିଥିମାନଙ୍କୁ ମଂଚକୁ ଆମନ୍ତ୍ରଣ କରିଥିଲେ । ମହାବିଦ୍ୟାଳୟର ସହକାରୀ ଅଧ୍ୟକ୍ଷ ପ୍ରଫେସର ସନ୍ତୋଷ କୁମାର ରାଉତ ଏହି ସନ୍ଧ୍ୟାର ଗୁରୁତ୍ୱ ଓ ଏହା ଓଡିଶା ପାଇଁ ସମର୍ପିତ ଏକ ଭିନ୍ନ ଉତ୍ସବ ବୋଲି କହିଥିଲେ । ପ୍ରଫେସର ସରୋଜ କୁମାର ମହାନ୍ତି ଓ ପ୍ରଫେସର ବିବୁଧ ପରାଶର ଏହି ଉତ୍ସବକୁ ସମ୍ବୋଧନ କରିଥିବା ବେଳେ ଉତ୍କର୍ଷିକାର ମୁଖ୍ୟ ଆବାହକ ପ୍ରଫେସର ବିଜୟ କୁମାର ମିଶ୍ର ଉତ୍ସବର ସାଂସ୍କୃତିକ ସଫଳତା କାମନା କରିଥିଲେ ।
ଡକ୍ଟର ଭୁବନାନନ୍ଦ ଅଧିକାରୀଙ୍କ ମଂଚ ସଂଯୋଜନାରେ ଅନୁଷ୍ଠିତ ଏହି ସନ୍ଧ୍ୟାରେ ବହୁ ଉଚ୍ଚକୋଟିର ସଂଗୀତ ଓ ନୃତ୍ୟ ପରିବେଷିତ ହୋଇଥିôଲା । ଡକ୍ଟର ସୁଚିସ୍ମିତା ମହାପାତ୍ର ଏହି ଉତ୍ସବର ଅନ୍ୟତମ ଉପସ୍ଥାପିକା ଥିଲେ । ଏହି କାର୍ଯ୍ୟକ୍ରମରେ ଓଡିଆ କବିତା ପାଠ ମଧ୍ୟ କରାଯାଇଥିଲା ।
ଡକ୍ଟର ଦେବୀ ଅର୍ଚ୍ଚନା ନାୟକଙ୍କ ନିର୍ଦ୍ଦେଶନାରେ ଓଡିଶା ବସ୍ତ୍ର ସମ୍ଭାର ପାଇଁ ସମର୍ପିତ ଏକ ର୍ୟାମ୍ପ୍ ୱାକ୍ ହୋଇଥିବା ବେଳେ ଡକ୍ଟର ଚକ୍ରଧର ପାତ୍ରଙ୍କ ଦ୍ୱାରା ଏକକ ଅଭିନୟ “ବନ୍ଦୀ” ମଂଚସ୍ଥ ହୋଇଥିଲା । ଲୋପାମୁଦ୍ରା ମହାନ୍ତି, ମାନସ ଦାସ, ଡକ୍ଟର ଇପ୍ସିତା ପଟ୍ଟନାୟକ, ପୁନମ୍ ପ୍ରୀତି ପ୍ରଧାନ, ଡଃ ବିଜୟଲକ୍ଷ୍ମୀ ନାୟକ, ଡକ୍ଟର ବିଶ୍ୱବାରା ସାହୁ, ରାକେଶ ଶତପଥୀ, ରାମକୃଷ୍ଣ ବସ୍ତିଆ, ସୁକୀର୍ତି ମହାନ୍ତି, ଡକ୍ଟର ବିଷ୍ଣୁପ୍ରିୟା ପାତ୍ର, ରାଜୀବ କୁମାର ବେହେରା ପ୍ରମୁଖ ଏହି ଉତ୍ସବ ପରିଚାଳନା କରିଥିଲେ ।
ଉତ୍କର୍ଷିକାର ଏ ଯାତ୍ରା ଚିରନ୍ତନ ହେବ ଓ ପ୍ରତିବର୍ଷ ଅଧ୍ୟାପକ, ଅଧ୍ୟାପିକା ଓ କର୍ମଚାରୀମାନଙ୍କ ଦ୍ୱାରା ଉତ୍କର୍ଷିକାର ବିଭିନ୍ନ ସଂସ୍କରଣ ଲୋକାଦୃତ ହେବ ବୋଲି ଏହି ଅବସରରେ ମତ ପ୍ରକାଶ ପାଇଛି ।